الخميس، 26 يونيو، 2008

الفرخة كلت بيضها



بصوا يا بني آدمين
من الآخر كدة
القطة خافت على عيالها.. كلتهم.. والفرخة كلت بيضها
وأنا باكل فى نفسي .. من كتر خوفي من إن أحلامي تضيع بادفنها.. باوئد بناتي زي فى الجاهلية كدة.. (بأي ذنب قتلت؟) لما تحلم مرة واتنين وتلاقى حلمك بينتهي وبينهار بدري بدري.. أكيد هاتخاف تحلم تاني.. بس تعمل إيه فى اللى عمال يكبر في دماغك ده؟! انت اتعودت تحلم.. بتحلم لا إراديا.. ربنا خلق فيك حاجة كدة تخليك لما تشوف الضلمة تفكر فى النور.. ولما تتوه لوحدك فى الصحرا تدور عالواحة اللى ترتاح فيها..
لكن الضلمة طولت .. والصحرا مشتها كتير مابتنتهيش..

فباسأل نفسي: وبعدين؟!.. ساعات بافكر أبقى آلة، أتحرك في حياتي بقوى التدافع والتصادم والقصور الذاتي.. من غير ماشغل نفسي بأي أحلام.. أفكر بس فى اللحظة اللى عايشها.. ومافكرش في بكرة.. بس لقيت نفسى ترس محبوس في آلة كبيرة مالوش حق في الاختيار.. وماقدرش أحدد أنا باعلى ولا بانزل.. بالف حوالين نفسي وبادوخ بس..

أوقات تانية باحلم براحتي.. باسيب نفسي أطير.. من غير قيود.. باجمع كل أحلامي وأحققها في حلم.. باطلع فى الزمن ألف سنة لقدام.. وأشوف عمري اللى فات كله لحظة.. حتي بيبقي عندى استعداد ساعتها للموت.. عشان باكون حققت كل أحلامي.. بس فجأة باقع على أرض الواقع وأعرف أنى ممكن أموت وماحققش ولا حاجة منها

تقريبا كدة يا جماعة قربت أوصل لحل.. لما الواحد شرّح نفسه معاكوا ابتدي يفهم برضه.. فيكوا الخير والله..
بيتهيألى إن الخيال بيصنع الخيال.. والواقع بيصنع الواقع.. بمعنى إن الحلم ممكن يخليك تحقق حاجة خيالية.. زى بيتهوفن لما يسرح فى الغابات والأنهار والسماء والأرواح.. لازم تطلع منه المزيكا العبقرية دى اللى هى فى حد ذاتها خيال.. انت ممكن تسرح فيها وانت بتكتب قصة.. ينتج عنها خيال آخر وآخر وهكذا....

لكن الواقع بقى انك تشتغل على حاجة حقيقية بإيدك مش بخيالك.. وتشوفها وهي بتتكون وتتحقق.. أي نعم الحقيقة دى كان أصلها فكرة في خيالك برضه.. لكن مجرد ماتدخل في إطار التنفيذ فهي اتحولت لواقع..

المشكلة بقى في متعة الحلم.. إن الحلم في حد ذاته ممتع.. و دى حاجة ممكن تخلي الواحد يحلم بحاجات كتير وعمره مايفكر يحققها..
كون الحلم اتحول لحقيقة فمعنى كدة إن الإبن كبر وقدر يعتمد على نفسه.. لكن طول ماهو حلم فهو عاجز عن خدمة نفسه ولازم ترعاه.. المشكلة انك هاترعى إيه ولا إيه؟ ولادك كتير.. وانت مش غني قوي يعني.. مش هاتعرف تغطى طلبات (أحلامك/عيالك) دى كلها.. شوفت بقى وأد البنات جاى من إيه؟؟ مش بس خوف من أنهم يفضحوك ويعرّوك ويبقى شكلك قدام نفسك وحــــــــــــــــــش.. لما تلاقيهم كلهم ماتحققوش.. لأ كمان عشان انت مش قادر تربيهم.. مش مستحمل تحلم أكتر من كدة وانت شايف المسافة بينك وبين حلمك بتطول مع الوقت مش بتقرب.. يبقى لازم توئد أحلام من أحلامك.. عشان الباقي يعيش.. وإلا كلهم هايموتوا من الجوع.. مع فقدك التدريجى للقدرة على الحلم..

مفيش فايدة.. يبقى الفرخة هتاكل بيضها يعني هتاكل بيضها.. بس مش كلهم.. ولا إيه ؟!

هناك 16 تعليقًا:

spideregypt يقول...

اشطه يا حاتم ..
كلامك كله صح الصح ..
كلام بالعاميه ميه ميه والله ..
عايزين من ده كتير يباشا وشكرا ^^..


الخيال بيولد خيال
والواقع بيولد واقع

بس الواقع محتاج لشويه خيال عشان يتنفذ

والخيال برده محتاج لشوية واقع عشان يتنفذ

يعنى مفيش مانع اننا نحلم بس منشطحش باحلامتا اوى

يعنى ميبقاش فى جيبك ربع جنيه مخروم وتقول انا نفسى ابقى مالتى ملياردير
ولو معرفتش تبقى كده تقول انا مش عارف احقق احلامى وتعيط

ممكن الواحد يحلم بالتدريج
ويطلع السلم خطوه خطوه

2008shimooo deram يقول...

العاصفير بلا جوانح لاتستطيع الطير والسمك بدون ماء لايستطيع ان يعيش والحلم بدون ارادة لايمكن ان يتحقق

سنووايت يقول...

حتي لو اكلت بيضها
هتبيض تاني وتالت

زي ما قلت ربنا خلقنا كدة بنحلم وبنحب نحلم
مش لازم كل احلامنا تتحقق
ومش لازم تتحقق في الوقت اللي احنا عايزينه
مفيش حد بيحلم واحلامه بتحقق بسهولة ,كل حد فينا حلم وحلمه انتهي وحلم تاني وطول ماحنا عايشين بنحلم
بس انا لاحظت ان اللي بيحقق احلامه هو اللي بيكون مؤمن من جواه انها هتتحقق واللي بيفضل ورا حلمه لحد ما يحققه مهما فشل قبل كدة في تحقيقه

خلي عندك امل, ان شاء الله تتحقق احلامك واحلامنا المؤجلة

سمو الأميرة سارة يقول...

المفروض ان الفرخة لما تكون مش قادرة تحمى بيضها ما تبيضهوش .. بس لأنها مش عاقلة بتبيضه وترجع تهد اللى تعبت فيه تانى .. دا الفرق بين البنى ادم والفرخة والقطة ، المفروض اننا عندنا عقل نعمل بيه كنترول على الاحلام .. نحلم الحلم اللى فى مقدورنا اللى ممكن يتحقق علشان يكون الحلم قوة دافعة لينا لقدام .. لكن لو حلمنا حلم اكبر من قدراتنا مش هينوبنا غير الاحباط ووجع القلب .. احلم يا حاتم بس احلم بعد ما تفكر وساعتها مش هتحتاج توئد حلمك صدقنى .. مدونتك اكثر من رائعة استمتعت بيها جدا جدا

حاتم عرفه يقول...

spideregypt
نورتنا والله وأسعدني مرورك وكلماتك
ونرجو تواجدك الدائم
.........................
shimooo deram
لو الواحد يطلع منك حكمة كدة كل يوم بمدونة كدة ولا حاجة ده أحنا ندونلك مخصوص كل يوم..
أثرت فكري كثيرا مشاركتك الصغيرة (الحكيمة) ونرجو دوام التواصل
.........................
سنووايت
فعلا الثقة في تحقيق الحلم بتساعد الواحد على تحقيقه
أسعدني كثيرا مرورك على مدونتي.. ويارب دايما..
.........................
سمو الأميرة ساراورة المبجلة
حلوة قوى الفرخة مش فادرة تحمي بيضها دي.. فعلا الواحد لازم يكون قادر على حماية (أحلامه) قبل مايبدأ في تحقيقها..لازم يكون قدها
وشرف كبير لينا يا فندم أنك تعدى على مدونتنا المتواضعة وتستمتعى بيها كمان.. لو كدة ندونلك كل يوم..

بالتوفيق دائما

Rana يقول...

أنا بعدي أهوه عشان بس متقولش معدتش عليك وبالرغم إني عاصرت الموضوع وهو بيتكتب .. بس صدقني أكيد طعمه غير لما اتقرا
عارف
انا عن نفسي يكفيني إني احلم حتى لو الحلم متحققش لأن في ناس كتيييييييييييييييييييييييييييييييير
مبتعرفش تعمل كده _ إنها تحلم _

كاتب مصري يقول...

تحيتي
دعوة لزيارة مدونتي المتواضعة
تقبل مروري ولي عودة

بحبك يامصر يقول...

اول زياره لمدونتك يا استاذ حاتم وبصراحه عجبتنى طريقتك فى العرض خفيفه وبسيطه وهبدأ تعليقى بالجمله دى
بيتهيألى إن الخيال بيصنع الخيال.. والواقع بيصنع الواقع.
كلمه جميله جدا وفعلا حقيقيه بس الواحد عشان يحط هدف قدامه لازم يحلم بس المهم هو بيحلم بحلم يتنفذ ولا حلم بعيد التنفيذ عشان يكون بيحلم بالخيال ويبقى اللى بيحلم بخيال بيصنع خيال
تحياتى ليك يا حاتم بوست حلو

حاتم عرفه يقول...

رانا هانم
عديتي وشرفتينا يا فندم .. يا رب دايما
و ربنا مايحرمكيش من الأحلام أبدا..
خاصة إن أحلامك بتبقى جميلة جدا يعنى
ربنا يوفقك..
......................

الكاتب المصري
نشكرك على مرورك
و نأمل بدوام التواصل
.........................

بحبك يا مصر
شرفتنا بمرورك يا ريس
ونفخر بأن مدونتنا لاقت إعجاب حضرتك
دمت بخير

غني يابهيه يقول...

لو بطلنا نحلم نموت يا بلدياتي


تحيات بهيه

يوميات فنانه مفروسه جداا يقول...

يعني انت يا تومه تدخل تقول كلام جميل للناس وانت هنا تقول الفرخه كلت بيضها؟؟؟؟؟؟؟؟؟ طب ازاي يعني

لا ماكلتش بيضها ولا حاجه وفي عز الضلمه القحط الواحد بيلاقي ضوء امل من بعيد وبأرادته بيوصله ويحقق اللي عايزه
ظروف الناس كلها صعبع اتمسك بحلمك واوعي يمر عليك الزمن وانت محققتتش ولو حاجه منه وبعدين انت لسه صوغير يعني19سنه مظنش الدنيا اسودت اوي يعني وبعدين فييييييين وانا في سنك كده يا بني كنت واخده الدنيا بالطول والعرض كحؤ ؤؤؤؤؤ كحؤؤؤؤؤه
-----------------------------
انا دخلت عالمدونه التانيه

ايه دهكله ايه ده كله

ماشاء الله انت اللي عامل مشروع وطن

لا برافو عليك والله والتصميمات هايله

انا درست جرافك سنه في الكليه وكنت شاطره فيه بس نسيته هههههههههههه
ومع الشغل تاني هفتكره ان شاء الله

وانا شغلي ديزاينر يعني اصمم حلي واكسسوار ومشغولات وكده
بس انت درست ايه او بتدرس ايه دلوقت

حاتم ربنا يكرمك ابقي حاول تنقل مدونتك من مكتوب لانه رخم اوي

واتوسل ايديك تشيل تأكيد الكلمه لانه بيخنقني جداااااااااااااااا

يلا اول تواصل ومش هيبقي الاخير

دمت مبدع اخي

محمد العدوي يقول...

مسلوق ولا مقلي يا عم


انا بس بسلم عليك ..


ازيها اسكندرية

حاتم عرفه يقول...

غني يا بهية..
نورتنا يا بلدياتنا..
و حلوة الحكمة السريعة دى..
ولا يحرمناش منك
ولا من عربياتك..
ولا من بحيرياتك..
ولا من إم بي ثريهاتك
........................
فنانتنا المفروسة..
أهلا أهلا بأول تواصل.. يا رب ديمها علينا يا رب..
كنتى شاطرة فى الجرافيك فى الكلية.. ما شاء الله عليكى.. طالعالى .. طول عمرى بقول البنت دى مستقبلها كويس جدا..

ولو أنى مش عارف إيه تصميمات الحلى والإكسسوارات ده.. شكله موضوع كبير.. يعنى هاتصممى شبكتك بقى وكدة؟؟
ولا بقى تقولى للعريس يجيب شبكة وبتاع؟
والله تبقى وفرتى عليه.. وربنا هايكرمك آخر كرم.. تعملى شبكتك كدة ديزاين عالكمبيوتر.. والحياة تبقى سهلة
فعلا ناوى أنقل مدوتى هنا بس واحدة واحدة.. وبأسلوب جديد.. تاتا تاتا
وما يحرمناش من تعقيلك .. تعليقك .. أبدا
.......................
محمد العدوي.. شرفتنا يا فندم..
و الله مسلوق ولا مقلي ده حسب ذوقك
شوف انت بتحب البيض بتاعك يبقى إزاى وأنا أوصى الفرخة عليك..
تنزلهولك مسلوق بقى محمر..
إحنا نحب نخدم زبوننا
إبقى تعالى كتير.. عاوزينك

ست البيت يقول...

حاتم ،،،

quote
بيتهيألى إن الخيال بيصنع الخيال.. والواقع بيصنع الواقع..
unquote
عجبتني قوي الجملة دي لأنها عبرت عن الكلام اللي دايما كنت بقوله للناس عشان تكون أحلم ولما تحلم اعمل أول الخطوات على الواقع ..أنت بتحلم تكون مدرس لازم تقعد على كرسي المدرس وتحضر الدرس وتقوم تضرب عيال وهميين بس اوعي حد يدخل عليك وقتها قابلني في العباسية
لو نفسك تكون م كمبيوتر ..اقعد على الكمبيوتر بوظه فصصه وحاول تصلحه (بس يار يت تكون بتعرف وإلا العواقف ح تكون وخيمه)
ودور على اللي يفيدك ما تيأسش مهما الزمن طال ...لازم حتتحقق الحلم
وبعض القطط بتضطر تضحي يعني وهي بتلم عيالها من مكان لمكان ممكن حاجة تاكل واحد من عيالها هي عارفة دا بس متقدرش تضحي بيهم كلهم وقادرة تنقذهم كلهم
يبقى الحل وسط ...
من الآخر لازم نستغني شوية عن بعض أحلامنا ..عشان نحقق الباقي ..
مدونتك حلوة قوي يا حاتم واسمها شدني
بس أنا بقى اللي حشدك لو الكتاب التاني طلع زي الأول
لأني بصراحة ....ناوية اشترك فيه

حاتم عرفه يقول...

ست البيت،،،

حلو موضوع أجرب أحلامي ده قبل مافكر أحققها.. فكرة جديدة
و مرمورك أسعدني جدا..
شرف ليا إن الإسم شد حضرتك..
لو ناوية تشديني فى الكتاب الجاي أنا تحت أمرك فى أى وقت..
ونرجو دوام التواصل

Lamia Moukhtar يقول...

لفرخة كلت بيضها دي فكرة فلسفية .. وكنت عايزه أتناقش في حتة إن الموسيقي والفن خيال نتج عن خيال غير الحاجات الملموسة .. هل هي فعلاً خيال ؟ .. طب ما هي موسيقي بتهوفن بتتعزف لحد دلوقت .. إذن دي مش خيال .. متهيألي أي حاجه بتجمع حواليها جمهور بتبقي مش خيال .. أنا نفسي ساعات بافكر إيه الفرق بين الأفلام والحقيقة مثلاً ؟ .. كان فيه فيلم بيناقش حاجه زي كده اسمه ( سايمون ) بتاع آل باتشينو والخواطر بتاعة حاتم فكرتني بيه ، عن مخرج اخترع علي الكمبيوتر نجمة سينمائية تشتغل بدل الممثلين اللي بيطلبوا أجور عالية ، وركبها علي أحداث فيلم والناس صدقوا إنها ممثلة من لحم ودم مش مجرد رسم كمبيوتر ، وبقت مشهورة أكتر من المخرج اللي ألفها لدرجة إنه قرر يتخلص من الشخصية دي وقال إنها ماتت ، الناس ما صدقوش وقالوا إنه لازم قتلها .. وكانت قصة طويلة ..