الاثنين، 13 أكتوبر، 2008

التاج علينا حق

الـتــــــاج علينا حق


وياريته تاج واحد.. لأ تلاتة .. من صديقة عزيزة مفترية لاسعة

يخليهالنا ويخلى جميع اللاسعين

هو اتأخر حبة بس يالا..


أدي تاج






وأدى التاني









و أدى التالت








ماتستغربوش ده أخويا الصغير
اسمه كدة تاج
أعملكوا إيه يعني اللى لقيت صورته على الجهاز ؟!!



هابدأ بقى علطول عشان مش هالحق أخلص أساسا

استعنا عالتيجان بالله


التــــــــــــــاج الاول


اذكر 6 اسرار قد لا يكتشفها من يقابلك لاول مره ؟

(مش عارف إزاى تبقى أسرار وأقولها ..
بس أديني هاحور زى غيرى ماحوروا)


1 / انى مش مبسوط خالص باللى باعمله.. رغم تشجيع ناس كتير ليا.. بس لسه.. حاسس انى بعييييييييد قوى عن أهدافي اللى عاوزها فعلا..

2 / مؤذي أوى.. أذيت ناس كتير جدا حواليا.. معرفش ليه؟ أو عارف بس باستعبط..
3 / مش صبور خالص (مستعجل يعني) بابقى عاوز الحاجة اللى عاوزها تحصل دلوقتى وأفوجأ بنفسي وأنا عمال أفكر وأهري في نفسي ولسه الحاجة بدرى عليها
4 / دمي تقيل موت (حد خبيث هايقولى مش سر ولا حاجة) لا يا خفيف بجد أنا دمي تقيل فعلا و بافوجأ (برضه) بنفسي وأنا عمال أقول كلام رخم كتير قوى.. المفروض يضحك.. ومابيضحكش ولا حاجة..
5 / بارد قوى.. ساعات الناس بتفتكرني حساس.. بس أغلب الوقت باحس أنى مش باحس بحاجة خالص.. وإنى فى حالة خمول وماتفرقش معايا أى حاجة تحصل..
6 / مابفهمش يا جدعان.. والله ما بافهم.. ليه دايما بتعاملونى على أنى فاهم.. أنا مش فاهم حاجة خااااااااااااااااالص..


التــــــــــــــاج الثاني


اذكر 16 صفه عن نفسك

ربنا يكرمه .. ربنا يكرمه



1/ طموح قوى.. عاوز أوصل للى هناااااااااااااااااااااك ده.. حد شايفه ؟

2 / حزين.. مش عارف ليه.. بس باظبط وشي كتير قوى على وشي نظرة حزن عمييييييقة..

3 / مرح جدا برضه.. ساعات باخلى ناس كتير حواليا يفرفروا من الضحك.. بتعليقات بسيطة..

4 / رومانسيتي عنيفة شوية.. عنيفة قوى.. مابعرفش أحس أنى رومانسي بطريقة تقليدية.. دايما رومانسيتي بتطلع خبط ورزع وطاخ.. ديش.. بوم..

5 / ممتزج بالبحر.. في بيني وبينه علاقة ود وألفة غير عاديين.. رغم أنى باشوفه كل يوم.. بس مش بعرف أقعد فى حضنه كتير..

6 / دماغى بتتصرف بمزاجها.. بجد والله مش هزار.. ساعات بالاقيها فهمت حاجات ماحدش فاهمها.. وساعات بحس أنها أبييييييييييييض

7 / غامض.. حتى بالنسبة لنفسي..

8 / بطيء جدا.. باحتاج وقت كتير عشان أنفذ أى حاجة.. إلا التصميم.. بتتلبسني روح عفريت أول ما ابدأ فى أي تصميم.. وأبقى شخص تانى.. سريع قوى

9 / بعرف أكون علاقات كتيرة بسرعة.. لكن باحتاج وقت طويل عشان يبقى ليا صديق حقيقي.. ولذلك عددهم قليل جدا

10 / متقلب قوى.. حاجات عبيطة جدا بتغير حالتي من النقيض إلى النقيض

11 / خيالي جدا.. ممكن أتخيل مشهد ويفضل مسيطر عليا.. معرفش أتخلص منه لغاية ما أوشك على الجنون

12 / بحب كتير أبقى لوحدي.. لكن مايكونش السبب ان محدش عايزنى

13 / بعرف كويس قوى أعمل الحاجة اللى لو واظبت عليها هاتأذيني بعد كدة.. مش باقتنع بالحاجات اللى تأثر على المستوى البعيد.. لو ماحصلتش دلوقتى تبقى مش هاتحصل.. عيب خطير قوى مش كدة ؟

14 / عملى قوي.. لدرجة مَرضيّة أحيانا.. ساعات بلاقى واحد متأثر بحاجة أفضل وراه لحد ماحسسه قد إيه هى سخيفة.. بيقولوا اللى إيده فى المية مش زى اللى إيده فى النار.. بحب قوى أخلى اللى قدامى يشيل إيده من النار

15 / قولت لأخويا الصغير يساعدني قالى : يوووووووووه ! .. تفتكروا يقصد إيه؟
في النهاية بعد إلحاح قالى: طوييييييييييل.. نسيتها ولا إيه؟

16 / أحيانا باكون متسلط قوى.. لا مش أحيانا أنا كدة فعلا..
تصدق علي جدا مقولة: يا فرعون إيه فرعنك؟ قال: هو احنا كنا لقينا حاجة ومالقنهاش



اذكر احلام تخص ماضيك كنت هتتخلى عن ايه وحققت ايه لحد دلوقت ؟

يااااااااااااااااااااه.. حلمت كتير قوى.. لكن الطيران كان نمرة واحد فى أحلامي تقريبا هو اللى اتخلى عنى.. بس أنا مش هاتخلى عنه برضه (إيه الرخامة تشي).. وهنشوف.. يا إما أوصل السما.. يا إما أندفن في الأرض..


اذكر شخصين على الاقل موجودين فى حياتك وكنت تتمنى وجودهم من قبل ؟

كل يوم باكتشف شخص جديد كنت أتمنى وجوده من زمان أو معايا من زمان.. وماخدتش بالى منه.. أو ماأخدش باله منى.. وأبويا وأمي برضه.. ابتديت اتعرف عليهم.. أظن أن هايبقى في بينا علاقة كويسة.. ربنا يسهل


اذكر شخصين غير موجودين فى حياتك وتتمنى وجودهم مستقبلاً فى حياتك وحياة ولادك ؟

شخص واحد: طائرة
شخص اتنين: هي




التـــــــــــاج الثــالــث


1_ ما أكثرَ شئ فعلتـَهُ وتركَ لكَ ألمًا نفسيًا .؟

أشياء كثيرة.. كانت بين يدي وأضعتها.. أو كان من الممكن أن أتحاشاها.. ولم أفعل ولكن كان لابد لها أن تحدث.. على الأقل حتى أتعلم..

2_ ما أكثرَ حادثةٍ عامة ٍتركتْ لكَ جرحًا نفسيًا .؟

أكثر من حادثة عامة حدثت فى حياتي.. كتير قوي.. وكلها حاجات توجع وتكسف.. بيتهيألى صخرة الدويقة من أسوأهم

َ3_ ما أكثرَ حادثةٍ خاصة تركتْ لكَ جرحًا نفسيًا .؟

فقد القدرة على الطيران.. مع بقاء الأمل الواهي..
(صعبة قوى)

4_ هل تعيش ُ الآن قصة َحب ٍ تتمنى أنْ تنتهى بالزواج ِ ؟

أعيش قصة حب مع نفسي.. إلى أن تتكون كما أود.. وعندما تتكون سأعرف ماينقصها.. وحينها سأكتمل بـ (ها)..

( تقدر تقول بقدر أقل من التفلسف :::: أن :: قلبي مغلق للتحسينات )

5_ كيف َ ترى الآخرين َ؟ كيف تحددُ علاقتـَكَ بهم ؟

بحب أعمل علاقات كتير قوى.. لكن كل ماتزيد علاقاتي بالناس.. كل ماتزيد المشاكل.. كل واحد بتقلق عليه.. وكل واحد بيجيلك عنده مشكلة.. لكن باحب امشي على الحديث الشريف : "الذي يخالط الناس ويصبر على أذاهم خير من الذي لا يخالط الناس ولا يؤذونه "
وعامة المليان بيكب على الفاضي.. زى مابيضايقونى أو بيشغلونى أكيد أنا كمان باشغلهم ولا إيه ؟


6_ ما أكثرَ شئ ٍ يسببُ لكَ أحراجًا مع الآخرين .؟

الذاكرة الضعيفة قوى.. أو التوهان بمعنى أصح.. ساعات كتير باكون باتكلم والاقى نفسي توهت.. هو أنا كنت باتكلم عن إيه؟. بس مابقتش باتحرج قوى.. خلاص اتعودت لما بيبقى حد مايعرفنيش بس باتضايق شوية.. بس بارجع أقول.. أديه عرفني....

ِ7_ من هو أقرب شخص إليك .؟

برجاء حددْ شخصًا مع عدم ِ الإلتزام ِ بذكرِ اسماء


أنـا
..
مع إنه أبــعـــــد شخص عنى برضه..!


ما هو حلمـُكَ لحياتـِك مستقبلا .؟

أحلام كتيييييييير ملو الخيال.. وألف مليون احتمال.. بس الأكيد أكيد ولا جدال (سلاماتنا لأحمد فؤاد نجم) الأكيد فعلا..

أنى عاوز أبقى أنا جدا..

نفسي أبقى أنا..


وما هو حلمـُك لوطنـِك .؟

نفسى ألاقيه..
أو يلاقيني..




بس خلاص


لولولوللولولوييييييييي


مش هامرر البتاع ده لـ حد..

هو اللى الناس عملته فينا هانطلعه عالناس ولا إيه؟؟
كل برغوت على قد دمه.. واللى عاوز ياخده ياخده..

هاخش أقيلي بقى يومين ولا حاجة ومش هاظبط المنبه

بس كان تاج حلو فعلا

تحياتي ليا

سلام



هناك 13 تعليقًا:

Butterfly يقول...

يااااااااااااااه
ده انت شردت نفسك على الأخر ههههههه
ليه كده بس
بس على فكره دى حاجه كويسه جدا انك تبقى عارف عيوبك عشان تبقى قدامك على طول وتصلحها ان شاء الله

سلام

سمو الأميرة سارة يقول...

ههههههههههههههه دمك تقيل ايه بس والله انا موتت من الضحك .. على فكرة مشكلة التوهان عندى بردو بتسبب لي مشاكل كتيييييييرة اوى واحراج لدرجة انى بدأت اكرهني .. بجد شخصيتك جميلة جدا جداً وجمييييييل اوى طموحك والاجمل بجد انك فعلاً قده .. ربنا يقويك ويوصلك للكويس من اللى بتحلم بيه
المفترية
ههههههههههههه

MaGn0liA... يقول...

انا برضه كنت ادبست فى تاجات كده

و لسه مبعوتلى تانى

:S:S

بس شكلك شخصيه غامضه بجد

على كل حال اجابات صريحه

دى احسن حاجه

غير معرف يقول...

ايووووووووو

اخيرا يا حاتم عرفتك .........

وبالمناسبه دى بهديلك اغنية

انا مش عارفنى



انا مش عارفنى
انا كنت منى
انا مش انا
لا دى ملامحى
ولا شكلى شكلى
ولا ده انا
..
أبص لروحى فجأة - لقتنى
لقتنى كبرت فجأة - كبرت
تعبت من المفاجأه ونزلت دمعتى
قوليلى ايه يا مرايتى
قوليلى ايه حكايتى
تكونشى
تكونشى دى نهايتى
واخر قصتى


يالا عوقبال ماعرفنى زى منت عرفتك

سلاموز باللبن والموز يا كابتن

عرفتنى ولا ايه؟

sara يقول...

اخوك زي العسل ربنا يخليه.....
كل الي انت قولته عنك مظبوط 100 في الميه واجمل انك كتبته بس لسه في اسئله كتير مش كتبتها وجوبت عليها.....كونك عارف نفسك ده ابداع وتطوير بجد سعيده جدا ديه اكتر حاجه عجبتني في اللي انت كتبته..ده انت مش ح تبقى بارع في التجارة..والتصاميم..والطيران ..ده انت ح تبقى بارع في التنميه البشريه بس اهم حاجه ركز اوي واتعب اوي و دور كتير على انت عايزه مع يقين انك ح تلاقيه بس يمكن مش وقته (وحب ماتعمل كي تعمل ماتحب)بصراحه كل سؤال عايزه تعليق صفحه كامله ...احتفظ بالي كتبته ده علشان ح تحذف منه كتير وح تتضيف له اكتر بكتير في المستقبل وحتكون راضي اوي عن نفسك وسعيدوكل الناس هيحبوك....

غير معرف يقول...

ايييه الكلام الجامد ده ياحتوووم
لحظة صفاء وصدق مع النفس نادرة
اظنك متصالح مع نفسك جدا
وده شيء ممتاز ، ولو ان اجاباتك تقول غير كده
لكن اعترافك ده هو اللي بيؤكد تصالحك ده مع نفسك
علي العموم انت اديتني خيط رفيع عن شخصيتك اللي لسة فيها كتيير
دمت لنا يامعلم

غير معرف يقول...

نسيت اقولك انا الغير معرف ده هو انا حبيبك محمود بدوي
ههههههههههههه

Omymah يقول...

إنت بقى وانت بتكتب الكلام دا كنت واخد حبوب الصراحة اللى فى السوق كلها!!!!

بس إنت طلعت دمك خفيف موت

Lamia Moukhtar يقول...

ياااه انت كل دول مع بعض في إزازه واحده يا حاتم ؟ .. طب ما توزع شوية علي أصحابك عشان نشيل عنك شوية أعباء .. بس هنشيل الصفات الحلوة ونخلي الصفات النص نص ليك يا عم .. شفت بقي القسمة العادلة ؟ ..

إنما إيه حكاية الطيران دي ؟

حاتم عرفه يقول...

butterfly
العزيزة..
معلش بقى.. حبة تشريد للذات.. ده أنا بس مش عاوز اتكلم عشان قدام الناس.. إنما(أنا) دى عاوزة تتربـى..
...............................
سمو الأميرة ســـارة
بجــد ؟ يعني أروح أمسح الصفة دى ؟ بس لأ برضه دمي تقيل.. يمكن جت معاكي كدة..
نشكرك يا فندم على غلاوة حماس تشجيع عواطف سيادتك لينا.. ولا يحمرناش منك أبدا..
يا رب يا رب.. صدقتى انك مفترية الحمد لله؟
ههههههه
...............................
magn0lia
اللى يجازيه اللى دبسنا..
فوقينا أهو.. ربنا يكرمه.. بس الحمد لله عدت على خير..
غامضة؟ جايز.. أنا غامض بالنسبة لنفسي برضه.. يمكن..
تحيا الصراحة..
شرفتنا يا فندم..
خليك هنا دايما علطول وأبدا..

حاتم عرفه يقول...

غير المعرف.. الأولاني مش متأكد منه عشان كدة هتاجهله وأطلعله لسان طويييييل
...........................
سارة..
عرفتي منين بقى إنى كدة فعلا ؟؟ ممكن جدا أكون باهتش.. يعني باحور.. و ماحبش أحس إن حد عارفني.. هه بس كدة..
حقيقي أهم حاجة انى أحتفظ باللى كتبته ده.. عشان أشوف هابقى عامل إزاى فى المستقبل..
ولو عايزة صفحة كاملة على كل سؤال إحنا مع بعضينا يعني.. مفيش مشاكل..
تحياتي ليكي..
...........................
الغير معرف التاني..
اللى طلع عينينا وطلع محمود بدوي فى الآخر..
نعمل إيه بقى.. أولادنا ولازم نستحمل.. يعنى تدوينتي قلبت معاك بخيط رفيع عن شخصيتي اللى لسه فيها كتير؟! كويس والله أهو نبقى عملنا حاجة في حياتنا..

حاتم عرفه يقول...

أستاذتنا أمنية..
حقيقي وجودك هنا يشرفني جدا قوى خالص يعني فوق الوصف.. وجميل إن الواحد ياخد حبوب ال صراحة والجراءة والكفاءة كتير.. عشان الناس اللى زى الفل دول يعرفوه كويس.. والأجمل إنى طلعت دمي خفيف موت حتى لو بالنسبة لسيادتكم بس..
كفاية عليا جدا..
صباح الفل والخزف واسكندرية .....
.............................
استاذتنا لمياء مختار..
شوفتى بقى إزازتي فيها حاجات قد إيه؟
أنا حطيتهم قدامكم واللى عاوز حاجة يمد إيده مايكسفش..
خدو كل حاجة ورجعولى ثروتي..
احم..
قصدي خدوا كل حاجة وسيبولى الطيران..
مش عاوز حاجة غيره..
عاوزة تعرفي حكايته؟
حكاية طويييييييييييييييييييييلة..
شوفتى بقى إزاى ؟

الله...الوطن...أما نشوف يقول...

نورتم مدونتنا المتواضعة يا فندم:)