الجمعة، 31 يوليو، 2009

أن تكون كوباية شاي

إنها تجربة عجائبية قمت بها مع إحدى زميلات بحر الحياة وهي مريم عمر
والفكرة تدور عن التجلي والتقمص والتحور - وشوية حاجات كدة –
أشكرها كثيرا على تلك المشاركة.
وتعاا اشربوا شاي

أن تكون كوباية شاي


سألتني عن إسمي .. فقلت لها :
- مش مهم.. كان ممكن يكون ليا اي اسم تاني غير اسمي .. اول ماتولدت كنت مجرد (ولد) وبعدها اختارولي اسم .. كان ممكن كمان اكون اتخلقت في هيئة حاجة تانية .. طيارة .. موجة .. فراشة .. فجلة

- وانا كان ممكن أكون سما أو قمر أو صرصار لسه خارج من البلاعه وبيدور على النور اللى مش هيلاقيه غير فى الحمام وينضرب بالشبشب او ممكن أكون قنبله حلوه وكويسه ومش عايزه تموت الناس اللى ملهمش ذنب فى حاجه بس حظها كدة او كوباية شاي .. مش بتعمل حاجة فـ الدنيا غير انها تتشرب

- تفتكري ايه يكون إحساس كوباية الشاي وهي بتتشرب .. وبتسمع مننا صوت شفففففففف .. أو إحساس الوردة وهي بتتشم وبتسمع مننا صوت : شمممممممم .. وايه رأيها في ريحتنا مثلا

- هى لو كوبايه او ورده بتحترم الغرض اللى اتخلقت عشانو ..أكيد هتكون فرحانه وحاسه بكل الرضا لكن لو كوبايه بتحقد على الكائنات اللى اعلى منها ..ممكن ........

- ممكن تكون هي الكوباية اللى بتلسع ضهر العيال الأشقية أو المدهولين .. أو تنكسر من إيديهم

- دا معناه انها ذكيه جدا وبعيده النظر وبجد تبقى كوبايه رائعة

- أو الوردة اللى تغلطي وتمسكيها من شوكها وتعورك .. بس استني خلينا في كوباية الشاي هتعملي ايه بقى ؟

- هطلع بخار لما أكون زعلانه .. ولما اكون فرحانه هبص فى السما .. وممكن اعمل اشكال بالبخار الى هيطلع منى .. والعب بفقاقيع الشاى بتاعتى

- ومين اللى كنتي هاتلسعيه ؟

- ألسع ناس كتير مش فاهمين هما بيعملوا ايه ومش بيفكرو في أثر اللى بيعملوه على الناس وممكن يجرحوهم وهما مش حاسيين

- وأنا كنت هاملى المج وانا سخن .. واقعد بين ايدين عيل بردان في عز الشتا .. واتمدد كبقايا في دستة كوبايات جنب بواب سهران
لكن ممكن تبقى باردة .. أو ناقصك سكر .. أو غير متصالحة مع النعناع في حين إن اللى عاوزك عاوزك بنعناعك .. ساعتها ........ ؟

- لو بردانة هاكون حزينه شويه وزعلانه من نفسى ومش عايزاه يشربنى ولما أفتكر ان هو اللى سابنى لحد ما بردت هكبر دماغى ولسان حالي يقول اذهب إلى الجحيم اذن .. والسكر .......

- والسكر نصيب .. هو ليه نصيبه من السكر .. وانا ليا نصيبي من السكر الدايب فيا .. هو ممكن يخلص نصيبه من السكر .. في دنيته .. والدكتور يقوله انسى يا عم القمور .. مفيش سكر تاني .. وانا ممكن أتشبع .. أو أعطش للسكر .. والنعناع .......... ؟

- مش هو برضو اللى محطش نعناع ؟ كوبايه الشاى ذنبها ايه ؟

- مممممممم وإمتى كنتي هاتندلقي ؟

- لما حظى الوحش يسوقنى لحد تايه زيى يخبطنى فى اى حاجه وممكن أحس انى عايزه انتحر وادلق نفسى ..بس طبعا انا كجماد مليش الصلاحيه انى اعمل كدا

- وانا ممكن أندلق عشان أحرم حد مني ..

. . في كتير كانوا زينا في يوم من الأيام .. شوية مية مش أكتر .. بس منهم اللى بقى كركريه واللى بقى ينسون واللى اتعلم في مدارس خاصة وبقى مياه غازية ..

- واللى بقى بارد .. واللى بقى سخن .. واللى بقى غالي .. واللى بقى رخيص .. لكن على حسب رؤيتى ككوباية شاى عجوزه .. المفروض يفكر بقى فى اللى هيشربه وينسى اللى فات وهل هيقدر يوصل رسالته ولا لأ

. . . . . .

- ممممممم على فكرة .. كوباية الشاي بتاعتي بردت وأنا باكلمك..

- على فكرة أنا ماليش في الشاي



لمعي يحتسي شايه الصباحي :)

السبت، 11 يوليو، 2009

كيف تصمم غلاف كتاب ؟

طلب مني أحد أصدقائي الأعضاء بجروب المصمم حاتم عرفة
أن أقوم بعمل درس أشرح فيه كيفية تصميم غلاف كتاب من الألف إلى الياء
و إن كان ذلك صعبا إلى حد ما من خلال النت
ولكني سأحاول أن أفعل هذا بقدر الإمكان

و ما سأشرحه الآن يتطلب أن يكون لدى المتلقي خلفية ما عن أدوات الفوتوشوب
وكيفية استخدامها
وتعليم تلك الأدوات متوفر بالكثير من المنتديات

والآن
تابعوا معي شرحي لكيفية تصميم أحد أغلفة كتبي
التي خرجت للنور بالفعل
و أتمنى أن يعينني الله على أن يستفيد أكبر قدر ممكن بهذا الذي سأقوم بشرحه
:)
.........


الخطوة الأولى من أي تصميم هي فتح ملف جديد للتصميم
وتحديد خصائصه
و ذلك من خلال قائمة
File > new

أو بالضغط على زريّ
Ctrl + N

واختيار المواصفات كما بالشكل التالي
وفيها مقاسات الغلاف
ومواصفاته
والمقاسات يمكن تغييرها بحسب المقاس المطلوب للغلاف




قمنا بمليء التصميم بألوان من اختيارنا
وهي التي ستسود التصميم
و يلاحظ اختلاف اللون الأمامي في وجه الغلاف عن اللون الخلفي
وسيتضح ذلك أكثر بعد قليل

و أيضا قمنا بعمل خطوط زرقاء قريبا من حواف الغلاف
وتقوم بتحديد كعب الغلاف
وتلك الخطوط الزرقاء تسمى
Guides
وتوضع عن طريق النقر على المساحة البيضاء للمسطرة
ثم السحب
حتى نتركها في المكان المناسب
ويفضل ان تكون على بعد سم واحد من الحواف


ثم نقوم بوضع الصورة التي اخترناها للغلاف
كما نراها في نافذة
Layers
وتلك هي الصورة الأمامية للغلاف


ثم الصورة الخلفية التي ستكون في ظهر الكتاب



وقمنا بعمل تدريجات على الصورة
بأداة التدريج اللوني
Gradient Tool
وذلك في طبقة جديدة كما يلاحظ هنا


ثم حددنا صورة الطفل الصغير
وغيرنا لونها للأبيض وأسود حتى تكون مميزة وسط الغلاف
وكررناها في ظهر الكتاب أيضا بحجم أصغر



والآن قمنا بتحديد كعب الكتاب
ويكون على حسب عدد صفحات الكتاب
وكما تلاحظون اختفت الخطوط الزرقاء
Guides
وذلك لأننا يمكننا إخفاء وإظهار تلك الخطوط أثناء التصميم
من خلال زريّ

; + Ctrl



والآن نصل لنهاية التصميم
والجزء الأسهل تقريبا
ويعتمد على الحس والاهتمام بتفاصيل وفراغات الصورة بشكل كبير
حيث نختار مكان النصوص المكتوبة في الغلاف
من عنوان وإسم الكاتب
والمقطع الخلفي
ولوجو الدار
إلخ ... من التفاصيل التي تضفي على التصميم رونقه الأخير
و نقدر نختمه في تلك اللحظة
ونرسله للطباعة مباشرة
D:





أتمنى إني أكون قدرت أفيد اللى عنده خلفية عن الفوتوشوب منكم بقدر ما
أو اللي يحب ياخد فكرة عن اللى بنستخدمه في الموضوع
ولو في أي تعليقات أو ملاحظات منكم
فأنا منتظرها
..
:)
تحياتي لكم