الأحد، 18 أبريل، 2010

فاكرة لما كنتي حلوة قوي ؟



فاكرة لما كنتي حلوة قوي ؟


فاكرة لما كنتي حلوة قوي ؟
وكنت باحب أصوّرك .. وانتى بتضحكي ..
وانتى بتبصي لفوق بعيييييد كأنك بتنادي عـ السما تنزلّنا ..
وأقولك انك أجمل حد هايعدي قدام الكاميرا دي طول عمري ..
وانتى مكسوفة وعينيكي مش راضية تثبت على عينيا ..

طب فاكرة لما كنا لسه حيرانين وبنداري ؟
كانوا حوالينا وبيحاولوا يصحصحوا الحكاية أكتر ..
كل حاجة كانت بتشجعنا .. بتقول ياللا .. كملوا ..
التفاصيل .. الرسايل اللى من فوق .. الصُدَف
كل شيء مظبوط بالمللي علينا
أغنيتي أخت أغنيتك .. ضحكتي بنت ضحكتك .. لهفتي منحوتة من لهفتك
كنتي حقيقية قوي .. وموجودة قوي ..
لما كنت باتتبع خطواتك اللي ماشية ورا حكايتي بكسوف ..

طب فاكرة حواديتي اللي كنت باحب أألفهالك ؟
وكنتي ماترضيش تنامي من غير ماحكيها ..
لما كنت باقولك انك بقيتي معايا في كل حاجة ..
جوه عينيا وانا باصور .. في قلمي وانا باكتب .. معايا قوي ..

فاكرة لما قولتلك انى باحتاجلك قوي ؟
واني لما باحتاج حاجة قوي بخاف منها ..
انك ماتعرفيش معنى الفقد زيي ..
وإني أخاف عليكي تجربيه ..

فاكرة كام مرة قولتلك: اوعي تبقى موجودة ومش موجودة ..
ومافهمتنيش .. ؟
فاكرة لما كنت باغلس عليكي بأغنية منير : بتبعديني عن حياتك بالملل
وكانت بتضايقك قوي ؟ ...........

بصي ..
مش عارف ليه مش مستنى رد منك ..
يمكن اتعودت على سكوتك ..
لكن انا فاكر كل ده .. كل ده محفور في دماغي قوي ..
بس اللى بحاول افتكره ........

أول مرة تدخلي تنامي من غير ما تطلبي مني حدوتة كمان ..
أول مرة ادخل انام من غير ما أدور على اسمك على الموبايل ..
أول مرة أسمع تهاني أو مواساة على حاجة .. وانا مش مستني اسمعها منك ..
أول مرة أحس انى لوحدي .. قوي ..
أول مرة أحس ان الرسايل دي .. بتهزر ..
أول مرة أحس اني معرفش عنك حاجة ..
أول مرة أسأل نفسي: هي حلوة فعلا ؟
أول مرة أمسك كاميرتي / أمسك قلمي / أشتغل ..من غير ما اسمع صوتك في عقلي ..
أول مرة امشي على البحر وايديا في جيوبي .. من غير ماحس بإيد ماسكة ايدي جوه جيبي ..
أول مرة تكوني قدامي عاوز اقولك كلام كتييييييير وماقولش ولا كلمة ..

أول مرة أحس انك مش موجودة .. خالص .. !

تصدقي مش فاكر ؟


.


هناك 3 تعليقات:

حنان الشافعي يقول...

وحشه
:"(
اه بقي وحشه
انا عارفه اللي حصل ده
شفته قبل كده
:"(

مجرد حلم صغنتوت يقول...

يمكن انا مش من هواة الادب الساخر اوي.. علشان كده مش عاجبني الموضوع التاني

النوت دي بقى
احساسها فظيع

كنتي حقيقية قوي .. وموجودة قوي

يمكن هي دي اهم حاجة.. انك تحس ان اللي بتحبه حقيقي.. موجود.. لو احتجته هتلاقيه.. لو محتاجه يسندك في اي وقت هيبقى اول واحد عايز يقف جنبك

اوعي تبقى موجودة ومش موجودة ..

هو ده المعنى بالظبط.. يبقى موجود ومش موجود في نفس الوقت.. ومحدش هيقدر يحس بده غيرك لأنه احساس مش ملموس

حلوة اوي النوت دي بجد

غير معرف يقول...

انا هايزة افهم
هو كان بيتخيل ان هو بيحب حد
ولا فعلا كان بيحب حد والحد دة مش بقي يحبة زي الاول



بليز عايزة رد؟؟